賽前睇好德國可以攞世盃冠軍，家陣佢哋嚟到4強，當然係好興奮，希望可以踢走埋西班牙入決賽啦！

　　猶記得德國前屆喺日韓打入決賽，俾人話全靠運氣，事關同佢哋同線嘅葡萄牙、意大利同西班牙都俾南韓搞死咗；而喺上屆，佢哋就靠主場。至於今屆，賽前佢哋冇咗隊長波歷克，而且射手高路斯喺過去一季又差到你唔信，整季德甲入得3球咁大把，所以冇人睇好佢哋。

　　不過睇番德國喺今屆嘅表現，真係好好，仲好過喺90年攞冠軍嗰陣時。16強佢哋大炒英格蘭  4:1，有人覺得係符碌，但之後對阿根廷亦贏4:0，能夠連炒兩支勁旅，靠嘅唔係運氣，真係有實力。

　　德國兩年前喺歐國盃決賽，0:1輸俾西班牙，雖然只係輸1球，但成場波俾西班牙球員係咁玩，連波皮都掂唔到，仲俾幫電視台講波嘅阿叻彈到一文不值，笑佢哋係細路對大人。德國今時唔同往日，我信佢哋可以報兩年前一戰之仇，推介佢哋贏西班牙食晒整個下盤。文：青蛙仔

　　今日貼士
　　星期三1德國（下）
　　信心指數：★★★★
　　註：5★最高