世界盃踏入16強階段，終於有場好波畀大家睇，前晚一場「德英大戰」，球證一個「超錯」判決，明明入波變唔入，將英格蘭打入18層地獄永不超生，相信大家一定睇到熱血沸騰。不過，正所謂好戲在後頭，一場「德英大戰」又點夠喉，今晚16強壓軸之戰，帶嚟兩「牙」相遇西班牙火併葡萄牙，試問咁強嘅戲碼大家又點可以錯過呢！

　　雖然賽前未知有冇咁多精采話題，但兩軍身處鄰國，今戰可謂國家中嘅打吡，呢場波唔係你死就係我亡，兩軍球員個個張牙舞爪，一定唔會放過對方，究竟係韋拿射波醒，定係C朗扭得勁，大家今晚記得落足眼力睇清楚喇！