我並唔鍾意儲波衫，但都想知意大利出局後件波衫插到去咩價位，若然合理都考慮吸納。喺體育版講行情佢認第2，冇人咁認第1嘅布魯士，就話有地方5嚿水連埋字好抵喎，我就嫌低處未算低。

　　今日巴西鬥智利係98年翻版，當年場波係近代其中一場最令人感動嘅比賽，感動係智利半場落後0:3時，教練阿哥斯達下半場換人踢夠4箭頭，結果逼到巴西踢真功夫，令人拍爛手掌。因為呢個舉動，阿哥斯達賽後獲國際足協表揚。

　　好記得嗰場波仲有一幕係巴西快速反擊，李安納度一攞波就有敵方橫身鏟截，說時遲那時快，佢連人帶波一跳跨過對方繼續進攻，似足《足球小將》主角嘅動作，型爆。可惜，雖然我確信當下成棚巴西兵都有類似技術，但做得到唔代表肯做，而喺防守當道嘅現代足球亦難重現巴西贏智利4:1嘅波膽。時移世易，今次要「細」。

　　今日貼士
　　星期一8巴西細
　　信心指數：★★★

　　註：5★最高