今晚世界盃又輪到衛冕冠軍意大利出場，該隊今仗遇新西蘭肯定會加倍留神，預計3分可以袋袋平安！計實力計經驗都是意大利秤先，新西蘭輸少當贏。不過意軍多項盤口都熱到乏味，考慮到「藍衣軍團」一向慢熱，是役3.4倍和主更值追捧！（周日6，有線61、64及201台周日10:00pm直播）

　　意大利在分組首戰對巴拉圭半場落後一球，其後大舉反撲終如願追成1比1，其實該仗意大利大有機會反勝，可惜基拿甸奴「敗家」多次失機，加上門將保方半場因傷退下火線，該隊失去精神領袖，故最終仍可在逆境中搶回一分，已算是有交代。

　　煲魚生粥屢見不鮮

　　門將保方因背傷已肯定緣盡決賽周，但意大利防線一向穩健，遇新西蘭未必有太多威脅，後備門將馬捷迪上陣都夠殺。中場派路亦要繼續養傷，但球隊近幾場已習慣了缺少這名AC米蘭球員，改由蒙杜利禾及迪羅斯領軍更顯得實際。無論如何，意軍陣營星光熠熠，要穩穩陣陣全取三分非難事，捧場客無須擔心。

　　新西蘭首戰迫和斯洛伐克1比1，球隊要踢到補時階段才入波，幸運成份蓋過了本身實力。事實上，以澳職球員為班底的新西蘭，陣中欠缺重心球員，全隊最紅的史美斯在腳法上亦相當粗糙，加上戰術單調，只懂得以「高Q大棍」轟炸對手，遇上以防守聞名天下的意大利實難有運行！

　　目前意大利在各項賠率都熱到爆，無論捧主勝或讓主都食之無味，不過意大利踢世界盃素來慢熱，遇弱旅「煲魚生粥」的場面屢見不鮮，與其重插少得可憐的主勝，不如向半全場方面埋手，和主3.4倍好分頭，大家不要走寶！