呢幾日心情有啲煩躁，除咗係因為世盃賽事貼熱門開冷門、博冷門又開熱門之外，亦因為最近為咗「起錨」而搞嗰啲大龍鳳。見到嗰啲幾廿歲人咁辛苦要撐「起錨」，其中一位靚仔仲唔覺意此地無銀三百両，話市民絕對唔會因為有海鮮餐先嚟撐場，真係唔知好嬲定好笑。

　　講番今屆世界盃，5屆冠軍巴西嘅實力真係唔講得笑，佢哋首場贏北韓，亦表現唔錯；不過，始終覺得巴西教練鄧加硬係要隊波踢實而不華足球，好似扼殺咗森巴足球嘅精髓咁。

　　巴西今日要面對科特迪瓦，而科特迪瓦嘅瑞典籍教練艾歷臣，最醒就係帶領球隊踢穩守突擊，喺02年世盃分組賽就係咁領英格蘭擊敗阿根廷；加上科特迪瓦料有射手杜奧巴復任正選，我相科特迪瓦起碼可以保不敗。畢竟，佢哋係今屆咁多支非洲隊中實力最好嘅一隊，點都要為非洲人民踢爭氣波啩！

　　今日貼士
　　星期日7科特迪瓦勝[+1]
　　信心指數：★★★
　　註：5★最高