今屆世界盃展開咗唔夠一個禮拜，就有機會做蘋果旺友，喺呢度推介心水，梗係希望帶挈大家啦！今日3場分組賽橫睇掂睇，都係以「狂牛」西班牙對瑞士「乳牛」呢場最有信心，其中狂牛人腳好又態勇，食硬瑞士，但鑑於西班牙[主/主]有1.85倍，好分過1.8倍嘅「主勝」，一於推介[主/主]。

　　迪帥陣法變化多端

　　由於西班牙當年喺86世界盃次圈大炒我愛隊丹麥，將佢哋踢出局，自此我就好留意呢隊「敵人」嘅一舉一動，希望做到知己知彼。時至今日，我對西班牙嘅認識雖然未到戰友牽牛咁滾瓜爛熟，但都有一定研究，以佢哋擁有韋拿、沙維及卡斯拿斯咁嘅人腳，瑞士邊係佢哋對手。

　　另外，西班牙教練迪保斯基亦係有料之人，會因應對手而排出4-3-3、4-1-4-1或者4-2-3-1，甚至4-4-2陣式，認真多變，問瑞士點頂？

　　今日貼士
　　星期三3西班牙[主/主]
　　信心指數：★★★★