睇完南韓第1場分組賽贏希臘，除咗對手真係老化之外，都要佩服一吓太極虎嘅鬥心，雖則出席決賽周嘅次數唔少，又係亞洲強國，但嗰種喺場上嘅拼搏精神，咁多年依然冇咩改變過，完全冇自視過高，當上少爺兵。

　　荷蘭「大」好分抵博

　　高麗兵體能勁已經唔需要再多講，但關鍵在於球員要肯走先至得，一於中場就開始壓迫對手搶截，完全唔得輕鬆踢波。另外，好似星君入第2球，就係趁對手失誤肯走前先至截到個波，之後嘅個人騷就純粹係技術同體力嘅合體演繹。至於今晚亮相嘅日本，02年主場嗰屆同樣踢壓迫足球，結果收效，但近年轉型踢技術，唔踢體能，結果冇晒賣點同優點，不進反退。

　　同日本一組嘅荷蘭，早場先鬥丹麥，我信橙軍攻擊力，預計呢場入波應該唔少，但入球「大」賠率卻偏冷，仲抵博。
　　戰鬥員A

　　今日貼士
　　星期一1荷蘭大
　　信心指數：★★★★

　　註：5★最高