世盃亞洲區外圍賽激戰，十強賽得番兩個席位可爭，伊拉克今晚在A組煞科戰同卡塔爾爭出線，我會撐主W，因為伊拉克主帥阿德南信心大過天，講明要出線團結全國人民，鬥志鮮明抵捧，相反卡塔爾用錢請埋成班僱傭兵，形勢上又必須贏波，生死關頭未必撻得。（廣東體育周一凌晨0:00直播）

　　阿聯酋可勝敘利亞

　　受政局混亂影響，伊拉克在外圍賽以阿聯酋杜拜做集訓基地同主場，佢們兩周前就度以一比○打沉出線大熱澳洲，據聞呢場波會有幾千個杜拜工作的伊拉克球迷撐場，聲勢唔會弱，加上對中國傷出的王牌射手尤尼斯傷勢無礙可以上陣，難怪阿德南有信心三連勝出線。

　　阿德南話，足球係唯一能夠將伊拉克全國人民團結的渠道，所以即使和波都出線，依然會吩咐球員盡全力贏波。至於要拎三分至翻到身卡塔爾，大部分國腳都係海外僱傭兵，無論默契、團結性都難免輸蝕，焗攻更加容易暴露後防漏洞！至於另一個十強賽席位會在E組阿聯酋主場對敘利亞產生，兩隊牌面始終有距離，要玩都係博近況、實力都較好的阿聯酋穩陣。（開賽時間：周一凌晨0:00）