世界盃亞洲區第三圈分組賽,中國隊經過三輪賽事同對手全部和氣收場後,依家澳洲同卡塔爾之後排第三,今日返回天津主場對住出線最大勁敵的卡塔爾,呢場絕對係打入最後十強的關鍵一戰。唔使問阿貴,阿占撐硬國家隊打開勝利之門!(有線61、中央5台及廣東體育周六晚8:00直播)
咪以為阿占支持國家隊純粹因為民族意識盲目追捧,有實際根據的!首先計對賽,國足唔單止唔輸蝕,反而仲有幾明顯的優勢添:最近六次同卡塔爾交手,在到三勝三和佳績,包括對上兩次的主場都奏凱,心理上有一定優勢。再講國家隊的防守近排都有穩定的演出,最近兩仗都保住唔失波,所以只要今場維持水準,已經封住蝕本門肯定唔使輸先,之後就可以再諗計靠中前場入波爭勝。
卡塔爾兩場客戰失3球
講到進攻,就唔可以唔提上個禮拜作客卡塔爾這場,當時國家隊排個四五一陣式,前面齋踢韓鵬一個,全場踢的都拉成均勢,特別係上半場前中段,仲畀到唔少壓力卡塔爾添!估計今日返到主場,在形勢所逼下,中前場仲可以進取些少,前線派夾慣夾熟曲波同韓鵬攻堅,再加埋從英格蘭浸過鹹水返回的鄭智組成進攻鐵三角,鋒力唔使懷疑。
況且呢場波中國的確係非勝不可,如果唔晒三分,真係隨時會提早出局,鬥心就肯定唔使懷疑!最重要係有主場的中國球迷打氣團,集合天時地利同人和,要攻陷近兩場作客連失三球的卡塔爾,難度唔算高!
頂『占』筍盤
中國 (主勝)